Bakının məşhur Keşlə bazarında köçürülmə prosesi başlayıb. Narimanov rayonunda yerləşən bu bazarın satıcılarına 1 fevral tarixinədək yeni məkana – Dərnəgül ərazisindəki ticarət mərkəzinə köçmək üçün vaxt verilib. Lakin satıcılar bu qərara fərqli reaksiyalar veriblər. Bəziləri yeni yerdə daha yaxşı şəraitin yaradılacağını düşünsə də, digərləri bu dəyişikliyin onlara böyük çətinliklər yaratdığını bildirir.

Bazarın köçürülməsindən narahat olan satıcılar xüsusilə mallarını qısa müddətdə yeni məkana daşımaqda çətinlik çəkdiklərini vurğulayırlar. Bir satıcı vəziyyəti belə izah edib: “O qədər malım var ki, hələ dünəndən yükləməyə başlamışıq, amma hələ də bitirə bilməmişik. Bizə heç olmasa mart ayına qədər vaxt versəydilər, yükümüz bir az azalar və köçürülmə daha rahat olardı”.

Yeni bazara köçən bəzi satıcılar isə başqa bir problemə diqqət çəkirlər – alıcı qıtlığı. Onların sözlərinə görə, köhnə bazarda hər gün müəyyən müştəri axını var idi, lakin yeni ünvana hələ insanlar tam uyğunlaşmayıb. Bir satıcı vəziyyəti belə izah edib: “Bu səhər buraya gəldik, amma alıcı yoxdur. Əsas problemimiz budur. Amma yerimiz daha yaxşıdır, əvvəl yağışın altında qalırdıq”.

Keşlə bazarının köçürülməsinə səbəb isə şəhərin yol infrastrukturunun inkişaf etdirilməsi ilə bağlı həyata keçirilən layihədir. Bakıda Həsən Əliyev küçəsindən Ziya Bünyadov prospektinə paralel olaraq "Koroğlu" metro stansiyasına qədər uzanacaq yeni avtomobil yolunun tikintisi nəzərdə tutulur. Bu layihə çərçivəsində yaşayış və qeyri-yaşayış obyektlərinin, o cümlədən Keşlə bazarının yerləşdiyi ticarət mərkəzinin sökülməsi planlaşdırılır.

Satıcılar isə hələ ki, yeni şəraitə uyğunlaşmağa çalışır və alıcı axınının artacağına ümid edirlər. https://daylinews-az.com/bakinin-kesle-bazarinin-kocurulmesi-saticilar-naraziliq-edir/