Azərbaycanda 2024-cü il ərzində əhalinin sosial müdafiəsini gücləndirmək üçün bir sıra mühüm addımlar atılıb. Xüsusilə aztəminatlı təbəqələrin alıcılıq qabiliyyətini artırmaq və real gəlirlərini yüksəltmək məqsədilə sosial ödənişlərdə artımlar həyata keçirilib.

Baş nazir Əli Əsədovun Milli Məclisdə hökumətin illik hesabatı zamanı verdiyi açıqlamaya görə, dövlət büdcəsinin 39 faizi – 14.6 milyard manatı sosial xərclərə yönəldilib. Bu da sosial sahəyə ayrılan vəsaitlərin əhəmiyyətli dərəcədə artdığını göstərir.

Pensiya və sosial müavinətlərdə artım

2024-cü ildə Azərbaycanda orta pensiya məbləği 12 faiz artaraq 494 manata çatıb. Yaşa görə pensiya isə 11.3 faiz artımla 528 manat olub. Bundan əlavə, ölkədə yaşayış minimumu 9.8 faiz artaraq 270 manat səviyyəsində müəyyən edilib. Aztəminatlı ailələr üçün nəzərdə tutulan orta aylıq sosial yardımın məbləği isə 475 manata çatdırılıb.

Baş nazir bildirib ki, prezident İlham Əliyevin rəhbərliyi altında son illərdə dörd böyük sosial paket həyata keçirilib və bu məqsədlə ümumilikdə 7 milyard manatdan çox vəsait xərclənib.

Şəhid ailələri və müharibə əlillərinə dəstək

Dövlət tərəfindən şəhid ailələri və müharibə əlillərinin mənzillə təminatı məsələsinə xüsusi diqqət ayrılıb. 2024-cü ildə bu kateqoriyadan olan insanlara 800 mənzil təqdim olunub. Bundan əlavə, müharibə əlillərinə 93 avtomobil verilib.

Həmçinin, hərbi qulluqçuların mənzil təminatına 35 milyon manat, güzəştli şərtlərlə vətəndaşların mənzil almasını dəstəkləmək üçün isə 100 milyon manat ayrılıb. Qəzalı binaların inventarlaşdırılması və sakinlərin təhlükəsiz yaşayış yerlərinə köçürülməsi ilə bağlı tədbirlər də davam etdirilib. Bu sahədə işləri sürətləndirmək üçün 2025-ci ilin dövlət büdcəsində əlavə 50 milyon manat vəsait nəzərdə tutulub.

Tikinti sektoruna yatırımlar

Hökumətin hesabatına əsasən, 2024-cü ildə ölkədə tikinti və montaj işlərinə yatırılan investisiyaların həcmi 15.5 milyard manata çatıb ki, bu da ümumi investisiyaların 72.4 faizini təşkil edir. https://daylinews-az.com/azerbaycanda-orta-pensiya-meblegi-494-manata-catdi/