Dünyanın müxtəlif bölgələrində martın 15-də nadir astronomik hadisə – tam Ay tutulması baş verdi. Ayın parlaq qırmızı çalar alması səbəbilə bu fenomen "Qanlı Ay" adlanır.

Ay niyə qırmızı rəngə boyanır?

Ay tutulması, Günəş, Yer və Ayın bir düz xətt üzərində sıralanması nəticəsində baş verir. Bu zaman Yerin kölgəsi tamamilə Ayı örtür. Lakin Ay tam yox olmur – Günəş işığı Yer atmosferindən süzülərək qırmızı və narıncı çalarlara boyanır. Eyni effekt gün doğumu və gün batımı zamanı da müşahidə olunur. Astronom Daniel Braun qeyd edir ki, atmosferdəki toz və buludların miqdarı nə qədər çox olarsa, Ayın rəngi bir o qədər parlaq görünər.

Tutulma harada müşahidə olundu?

Bu astronomik hadisə Amerika qitəsi, Atlantik və Sakit okean bölgələri, Avropanın və Afrikanın qərb hissələrində müşahidə edildi. Tutulma ümumilikdə 6 saat davam etdi, tam tutulma mərhələsi isə təxminən 1 saatdan bir qədər çox çəkdi.

"Qanlı Ay" anlayışının mənası nədir?

"Qanlı Ay" termini Amerikanın yerli xalqlarının ənənələrindən qaynaqlanır. Astronom Daniel Braun isə bu adlandırmanın xurafatla əlaqəli olmasına görə ondan istifadə etməyi xoşlamadığını bildirir. Afrika mədəniyyətlərində Ay tutulması Günəş və Ay arasında bir münaqişə kimi qəbul edilirdi. İnanca görə, bu münaqişəni yalnız Yer üzündəki insanların birgə səyi ilə həll etmək mümkün idi.

Növbəti tutulmalar nə vaxt olacaq?

Bu, 2022-ci ildən bəri ilk tam Ay tutulması idi. Sentyabr ayında daha bir tam Ay tutulması gözlənilir. Martın 29-da isə qismən Günəş tutulması baş verəcək. Bu hadisə Şimali Kanada, Şimali Afrika, bəzi Avropa bölgələri və Rusiyanın şimalında müşahidə olunacaq.

Astronomlar xəbərdarlıq edir ki, Günəş tutulmasına birbaşa baxmaq təhlükəlidir. Bunun üçün xüsusi qoruyucu eynəklər və ya proyeksiya cihazlarından istifadə etmək lazımdır. https://daylinews-az.com/qanli-ay-goyu-qirmiziya-boyadi-nadir-ay-tutulmasi-musahide-edildi/