İsrail hökuməti ABŞ-ın vasitəçisi Stiv Vitkoff tərəfindən təqdim olunan atəşkəs və girov mübadiləsi planını həyata keçirməyə hazır olduğunu bildirib. Məlumatı Axios nəşrinin müxbiri Barak Ravid öz mənbələrinə istinadən yayıb.

Mayın 29-da İsrailin Baş naziri Benyamin Netanyahu girov ailələri ilə görüş zamanı Vitkoffun planına əməl etməyə hazır olduğunu bəyan edib. Jurnalistin sözlərinə görə, bu məlumatı həmin görüşdə iştirak etmiş bir şəxs təsdiqləyib.

HƏMAS narazıdır: “Plan İsrailin xeyrinədir”

HƏMAS hərəkatı isə təklif olunan planla razı deyil. Qrup nümayəndələri hesab edir ki, Vitkoffun təklifində İsrailin maraqları daha çox qorunur. Bundan başqa, təklifdə ABŞ tərəfindən atəşkəsin uzunmüddətli sülh prosesinə çevrilməsini təmin edən heç bir konkret təminat yoxdur.

Plan, həmçinin, danışıqlar 60 gündən artıq davam edərsə, atəşkəs müddətinin uzadılacağını və İsrailin birtərəfli şəkildə onu poza bilməyəcəyini də zəmanət altına almır.

HƏMAS hələlik rədd cavabı verməyib

Barak Ravidin məlumatına görə, HƏMAS rəhbərliyi planı hələlik rəsmən rədd etməyib, lakin narazılıqlarını açıq şəkildə ifadə ediblər.

“İsrailli yüksək vəzifəli şəxs mənə bildirdi ki, İsrailin kəşfiyyat xidmətlərinin proqnozuna görə, HƏMAS planı rədd edəcək,” – deyə Ravid bildirib.

ABŞ danışıqlarda irəliləyiş gözləyir

Bundan əvvəl Axios xəbər vermişdi ki, ABŞ Qəzza zolağında döyüşlərin dayandırılması ilə bağlı danışıqlarda yaxın zamanda “irəliləyiş” gözləyir.

Son iki həftədə Stiv Vitkoff Benyamin Netanyahu və onun müşaviri Ron Dermerlə, həmçinin Qətərin paytaxtı Dohada fələstinli-amerikalı iş adamı Bişara Baxbax vasitəsilə HƏMAS rəhbərliyi ilə təmasda olub. https://daylinews-az.com/?p=7086