İşdən çıxmalar NASA-nın planlaşdırılmış genişmiqyaslı büdcə ixtisarları fonunda baş verir.

ABŞ-ın dövlət kosmik agentliyi olan NASA-da 2025-ci il iyulun 25-də başa çatan təxirə salınmış ixtisar proqramının ikinci mərhələsi zamanı təxminən 3000 əməkdaş istefa ərizəsi verib. Bu barədə Bloomberg məlumat yayıb.

İlin əvvəlində keçirilən ilk mərhələdə daha 870 nəfər iştirak etmişdi. Beləliklə, agentlik ümumilikdə 4000-ə yaxın işçisini – bu da bütün heyətin təxminən 20 faizini təşkil edir – itirə bilər.

Proqram ilk dəfə yanvar ayında Tramp administrasiyasının təşəbbüsü ilə başladılıb. Məqsəd federal qurumların ixtisarıdır. Proqrama əsasən, əməkdaşlara könüllü olaraq işdən çıxmaq təklif olunur, lakin müəyyən müddət ərzində əmək haqqı və güzəştləri almağa davam edirlər. Bu proqram DOGE ilə əməkdaşlıq çərçivəsində hazırlanıb və o dövrdə İlon Mask rəhbərlik edirdi.

Bloomberg qeyd edir ki, bu ixtisarlar NASA-nın planlaşdırılan büdcə azalmaları fonunda baş verir. Bu isə agentliyin əsas elmi proqramlarını, xüsusən də kosmosun tədqiqi və uçuş təhlükəsizliyi sahələrindəki fəaliyyətlərini risk altına ata bilər.

İyulun əvvəlində Politico yazmışdı ki, artıq 2000-dən çox NASA-nın yüksəkvəzifəli rəhbərləri agentliyi tərk etməyə razılaşıblar. Kadr axını elmi ictimaiyyətdə ciddi narahatlıq doğurur.

İyulun 21-də hazırkı və keçmiş əməkdaşlardan ibarət bir qrup NASA rəhbəri vəzifəsini icra edən Şon Daffiyə açıq məktub ünvanlayıb. Onlar həmin məktubda “zərərli ixtisarları” dayandırmağa çağırıblar və bunun “dövlət vəsaitlərinin israfına, insanların təhlükəsizliyinə, milli təhlükəsizliyə və agentliyin missiyasına təhlükə yaratdığını” bildiriblər. https://daylinews-az.com/?p=8601