Azərbaycanda bank və digər maliyyə institutlarının müştəriləri üçün rezidentlik məlumatlarının təqdim edilməsinə dair yeni tələb tətbiq olunacaq. Bu dəyişiklik Vergi Məcəlləsinə təklif olunan düzəlişlər paketi çərçivəsində nəzərdə tutulub və sənəd Milli Məclisin 16 dekabr plenar iclasının gündəliyinə daxil edilib.​

Hesab açan fiziki və hüquqi şəxslər nə etməlidir?

Layihəyə görə, maliyyə institutları fiziki və hüquqi şəxslərə hesab açarkən və ya onlara hər hansı maliyyə xidməti göstərərkən, həmin şəxslərdən vergi və maliyyə məlumatlarının beynəlxalq mübadiləsini nəzərdə tutan müqavilələrin icrası üçün rezidentlik statusunun müəyyən edilməsinə dair zəruri məlumat və sənədləri tələb edəcək. Bu, Azərbaycanın qoşulduğu beynəlxalq vergi şəffaflığı standartları, xüsusilə avtomatik məlumat mübadiləsi mexanizmləri (CRS, FATCA və s.) ilə uyğunlaşdırma məqsədi daşıyır.

Eyni zamanda, əgər sonradan şəxsin rezidentlik statusuna təsir edən hər hansı dəyişiklik (daimi yaşadığı ölkə, vergi rezidentliyi, ünvan və s.) baş verərsə, bu barədə məlumat və təsdiqedici sənədlər həmin dəyişikliyin baş verdiyi tarixdən 30 gün ərzində maliyyə institutuna təqdim olunmalıdır. Tələb həm bank hesabı olan rezidentlərə, həm də Azərbaycanda hesab açan qeyri-rezident investorlara şamil ediləcək.

Yanlış məlumat verənlər inzibati məsuliyyətə cəlb olunacaq

Dəyişiklik paketində xüsusi olaraq qeyd olunur ki, maliyyə institutlarına qəsdən yalan və ya təhrif olunmuş məlumat, sənəd təqdim edən, eləcə də rezidentlik statusunu dəyişən, amma bunu 30 gün müddətində bank və ya digər maliyyə təşkilatına bildirməyən şəxslər inzibati məsuliyyətə cəlb edilə bilər. Bu məsuliyyət İnzibati Xətalar Məcəlləsinə uyğun olaraq müəyyən olunacaq və sanksiyaların cərimə formasında tətbiqi gözlənilir.

Ekspertlərin fikrincə, bu tip tələblər beynəlxalq praktika üçün standart sayılır və məqsəd həm vergidən yayınma hallarının qarşısını almaq, həm də kölgə iqtisadiyyatından gələn vəsaitlərin maliyyə sistemində leqallaşdırılmasını məhdudlaşdırmaqdır. Eyni zamanda, banklar üçün müştərini tanı (KYC) və pul yuyulmasına qarşı (AML) prosedurların gücləndirilməsi baxımından əlavə hüquqi baza formalaşdırılır.