Bu ilin yanvar-oktyabr aylarında ölkə iqtisadiyyatında muzdla çalışan işçilərin orta aylıq nominal əməkhaqqı ötən ilin eyni dövrü ilə müqayisədə 9,4% yüksələrək 1 086 manat səviyyəsinə çatıb. Bu dinamika əmək bazarında gəlirlərin artdığını, həm də inflyasiya fonunda əməkhaqqı siyasətinin qismən kompensasiyaedici rol oynadığını göstərir. Rəsmi məlumata görə, mədənçıxarma sənayesi, maliyyə və sığorta fəaliyyəti, informasiya və rabitə, peşə, elmi və texniki fəaliyyət, həmçinin nəqliyyat və anbar təsərrüfatı üzrə çalışanların orta aylıq maaşı ümumi göstəricidən daha yüksəkdir.

Muzdla çalışanların sayı və bölgüsü

1 noyabr tarixinə Azərbaycan iqtisadiyyatında muzdla işləyənlərin sayı 1 782,4 min nəfər olub. Onların 865,7 min nəfəri dövlət sektorunda, 916,7 min nəfəri isə qeyri-dövlət sektorunda fəaliyyət göstərir. Muzdla çalışanların strukturunda ticarət və nəqliyyat vasitələrinin təmiri sahəsində işləyənlər 18,8%, təhsildə çalışanlar 18,1%, sənayedə çalışanlar 14% təşkil edir. Əhaliyə səhiyyə və sosial xidmətlər göstərənlər 8,6%, tikinti sahəsində çalışanlar 6,7%, dövlət idarəetməsi, müdafiə və sosial təminatda çalışanlar 6,3% paya malikdir.

Nəqliyyat və anbar təsərrüfatında çalışanlar 4,5%, peşə, elmi və texniki fəaliyyət sahəsində çalışanlar 4%, kənd təsərrüfatı, meşə təsərrüfatı və balıqçılıqda çalışanlar 2,4%, maliyyə və sığorta sektorunda çalışanlar isə 2,3% təşkil edir. Qalan 14,3% isə iqtisadiyyatın digər sahələrində məşğuldur.