ABŞ-da maliyyəçi Ceffri Epşteynlə bağlı istintaq materiallarında yeni detallar üzə çıxıb. Məlum olub ki, 2005-ci ildə Floridadakı malikanədə polis axtarışı aparılmazdan əvvəl Epşteynin vəkilinin işə cəlb etdiyi özəl detektiv evdən bir sıra materialları çıxarıb.

Amerika mediasının ABŞ Ədliyyə Nazirliyinin açıqladığı sənədlərə istinadən yaydığı məlumata görə, söhbət Pol Leyveri adlı detektivdən gedir.

Bildirilir ki, o, hüquq-mühafizə orqanlarının reydi başlamazdan öncə malikanədən bir neçə kompüter, iyirmidən çox telefon kitabçası və seksual xarakterli materiallar da daxil olmaqla müxtəlif sübutları götürüb.

İstintaqın gedişinə təsir edən məqamlar

Sənədlərdə qeyd olunur ki, prokurorlar Epşteynə qarşı ilk cinayət işi üzrə istintaq apararkən həmin materiallara çıxış əldə etməmiş ola bilərlər. Bu fakt işin erkən mərhələsində toplanmalı olan sübutların tam araşdırılmaması ilə bağlı suallar doğurur.

Fevralın 15-də ABŞ Ədliyyə Nazirliyi Epşteyn işi üzrə sənədlərin dərcini yekunlaşdırıb. Baş prokuror araşdırma materiallarında adı keçən 300 tanınmış şəxsin adını açıqlayıb.

Siyahıda Donald Tramp, Barak Obama, Bill Klinton, Bill Qeyts, İlon Mask, Kurt Kobain və digər məşhurların adları yer alır.

Epşteyn 2002–2005-ci illərdə Nyu-Yorkun Manhetten bölgəsindəki evinə və özünə məxsus şəxsi adaya azyaşlı qızların gətirilməsini təşkil etməkdə ittiham olunurdu. İstintaq materiallarına əsasən, zərərçəkənlər arasında ən kiçik yaş həddi 14 olub.

Maliyyəçi 2019-cu ilin avqustunda saxlanıldığı həbsxana kamerasında huşsuz vəziyyətdə tapılıb və onun həyatını xilas etmək mümkün olmayıb. İşlə bağlı müzakirələr və yeni sənədlərin açıqlanması isə ictimai diqqəti yenidən bu qalmaqallı dosyeyə yönəldib.