Avrokuboklarda pley-off mərhələsinin başa çatması ilə UEFA-nın ölkələr üzrə əmsallar cədvəlində cari mövsümün yekun sıralaması dəqiqləşib. Azərbaycan 2025/26 mövsümünü 27-ci pillədə başa vurub.

Hazırda ölkəmizin hesabında 22.937 əmsal xalı var. Azərbaycan siyahıda 23.968 xala malik Sloveniya ilə müqayisədə bir pillə geridə qərarlaşıb. 27-ci yerdən aşağıda olan ölkələrin isə artıq Avropa turnirlərində təmsilçisi qalmayıb və bu səbəbdən mövqelərdə dəyişiklik gözlənilmir.

Son beş ilin ən yaxşı nəticəsi

Mütəxəssislər bu göstəricini Azərbaycanın son beş illik reytinq tarixində ən uğurlu nəticəsi kimi qiymətləndirirlər. Son mövsümlərdə klublarımızın avrokuboklarda topladığı xallar ümumi əmsala müsbət təsir göstərib və ölkənin mövqeyini sabitləşdirib.

Bundan əlavə, növbəti mövsümün əvvəlində cədvəldə dəyişiklik gözlənilir. 2021/22 mövsümünün xalları silinəndə, hazırda 25.750 xala sahib Serbiya 9.500 xal itirəcək. Azərbaycan isə həmin mövsümdə qazandığı 4.375 xalı itirsə də, ümumi balans nəticəsində bir pillə irəliləyərək 26-cı sıraya yüksələcək.

Reytinq cədvəlinə 113.130 əmsalla İngiltərə başçılıq edir. Maraqlıdır ki, bu ölkə mövsümə başladığı 9 klubun hamısını avrokuboklarda saxlayaraq lider mövqeyini daha da möhkəmləndirib.

UEFA əmsal cədvəli ölkələrin növbəti mövsümlərdə avrokuboklarda neçə komanda ilə təmsil olunacağını və hansı mərhələdən mübarizəyə başlayacağını müəyyənləşdirdiyi üçün xüsusi əhəmiyyət daşıyır.