Məşhur britaniyalı aktrisa, “The White Lotus” (“Ağ Lotus”) və “Sex Education” (“Seksual Təhsil”) seriallarının ulduzu Eymi Lu Vud Şarlotta Brontenin klassik romanı “Ceyn Eyre”in yeni ekranlaşdırmasında baş rolu ifa edəcək.

Deadline-ın məlumatına görə, Vud XIX əsr İngiltərəsinin sosial məhdudiyyətlərinə qarşı duran, iradəli və müstəqil Ceyn obrazını canlandıracaq.

Yeni adaptasiyanın yaradıcı heyəti

Filmin ssenarisini Amerika Ssenaristlər Gildiyasının (WGA) mükafatına layiq görülmüş Meriam Batti yazır. O, mürəkkəb psixoloji mövzuları və güclü qadın obrazlarını ekranda ustalıqla təqdim etməsi ilə tanınır, bu səbəbdən yeni “Ceyn Eyre” adaptasiyası böyük maraq oyadıb.

Şarlotta Brontenin 1847-ci ildə nəşr olunan “Ceyn Eyre” romanı həm yazıçının ən məşhur əsəri, həm də şəxsi təcrübələrinə əsaslanan klassik İngilis ədəbiyyatı nümunəsidir.

Əsərdə Ceynin uşaqlıqdan böyüməyə qədər keçdiyi ağır yol, öz kimliyini tapmaq mübarizəsi, sevgi və müstəqillik arzusu, həmçinin sinfi ayrı-seçkilik, din və qadının cəmiyyətdəki rolu kimi mövzular əks olunur.

Bronte irsinin ekran həyatı

Şarlotta Bronte İngilis ədəbiyyatının ən tanınmış qadın yazıçılarından biridir. Onun əsərləri arasında “Ceyn Eyre”, “Müəllim” və “Villet” xüsusi yer tutur. Roman sonuncu dəfə 2011-ci ildə Keri Fukunaqanın rejissorluğu ilə ekranlaşdırılmış və baş rolu Mia Vasikovska yaratmışdı.

Bronte bacılarının digər əsərləri də kino üçün tez-tez adaptasiya olunur. Bu yaxınlarda aktrisa və rejissor Emiral Fennell Emili Brontenin “Küləkli Zirvələr” romanını ekranlaşdırmış, filmdə Marqo Robbi və Ceykob Elordi baş rollarda çıxış etmişdilər.

Son illərdə qotik hekayələrə olan marağın artması Bronte irsinə diqqəti yenidən gücləndirib. Yeni “Ceyn Eyre” ekranlaşdırmasının klassik hekayəni müasir tamaşaçıya daha emosional və vizual cəhətdən təsirli formada təqdim edəcəyi gözlənilir.