Bu gün Mingəçevirdə beynəlxalq səviyyəli “Prezident Kuboku 2026” reqatasının rəsmi açılış mərasimi təşkil olunacaq. Avarçəkmə və kanoe üzrə keçirilən yarış artıq regionun ən nüfuzlu idman tədbirlərindən biri kimi tanınır və hər il daha geniş iştirakçı kütləsini cəlb edir.

Gənclər və İdman Nazirliyi ilə Azərbaycan Su İdman Növləri Federasiyasının birgə təşkil etdiyi yarış çərçivəsində gün ərzində bir neçə mərhələdən ibarət proqram planlaşdırılıb.

İlk olaraq saat 14:00-dan etibarən rəsmi şəxslər və qonaqlar Ümummilli Lider Heydər Əliyevin Mingəçevirdə yerləşən abidəsini ziyarət edəcəklər. Ardınca isə iştirakçı ölkələrin komandaları şəhərin əsas küçələrindən biri olan Heydər Əliyev prospekti boyunca parad keçidi ilə tamaşaçıların qarşısına çıxacaqlar.

Açılış mərasimi və beynəlxalq iştirak

Axşam saat 19:00-da “Kür” Olimpiya Tədris-İdman Mərkəzinin qarşısında möhtəşəm açılış mərasimi baş tutacaq. Tədbir çərçivəsində zəngin bədii proqram hazırlanıb – səhnədə milli və müasir rəqs nömrələri, musiqi ifaları və xüsusi şou elementləri nümayiş etdiriləcək. Gecənin sonunda isə atəşfəşanlıq təşkil olunacaq və bu, Mingəçevirdə bayram əhval-ruhiyyəsi yaradacaq. Qeyd edək ki, reqataya start artıq verilib – ilk yarışlar Ağdərə rayonundakı Sərsəng su anbarında keçirilib.

Turnirdə Azərbaycanla yanaşı, Çexiya, Gürcüstan, Almaniya, Yunanıstan, Qazaxıstan, Qırğızıstan, Litva, Moldova, Rumıniya, Serbiya, İsveç, Tacikistan, Türkiyə, Ukrayna və Özbəkistan daxil olmaqla 16 ölkədən 100-dən çox idmançı mübarizə aparır. Bu geniş coğrafiya yarışın beynəlxalq statusunu və idman baxımından əhəmiyyətini bir daha təsdiqləyir.

“Prezident Kuboku 2026” reqatasına mayın 1-də yekun vurulacaq. Yarış həm idman nəticələri, həm də ölkənin turizm və beynəlxalq imicinin gücləndirilməsi baxımından mühüm rol oynayır.