Azərbaycanı Gürcüstan və Türkiyə üzərindən Avropa ilə birləşdirən Bakı-Tbilisi-Qars dəmir yolu xətti yaxın günlərdə tammiqyaslı istismara veriləcək. Region üçün strateji əhəmiyyət daşıyan layihənin rəsmi açılışı iyunun 2-də Gürcüstanın Axalkalaki stansiyasında baş tutacaq.

Tədbirdə Azərbaycan, Gürcüstan və Türkiyədən dövlət rəsmilərinin, nəqliyyat və logistika sektorunun nümayəndələrinin iştirakı gözlənilir. Bakı-Tbilisi-Qars xətti 2017-ci ildən sınaq rejimində fəaliyyət göstərsə də, layihənin rəsmi istifadəyə verilməsi məhz bu il həyata keçiriləcək.

BTQ xətti regionun əsas nəqliyyat marşrutlarından sayılır

Bakı-Tbilisi-Qars dəmir yolu Asiya ilə Avropa arasında yükdaşımaların sürətləndirilməsi baxımından mühüm layihələrdən biri hesab olunur. Magistralın ümumi uzunluğu 827 kilometr təşkil edir. Bunun 213 kilometri Gürcüstan ərazisindən keçir.

Layihənin Gürcüstan hissəsinin maliyyələşdirilməsi üçün Azərbaycan tərəfindən 775 milyon ABŞ dolları həcmində kredit ayrılıb. Həmin vəsaitin gələcəkdə daşınmalardan əldə ediləcək gəlirlər hesabına qaytarılması planlaşdırılır.

Modernizasiya işlərindən sonra imkanlar genişlənib

“Azərbaycan Dəmir Yolları”nın açıqlamasına əsasən, 2023-cü ilin may ayından 2024-cü ilin may ayınadək BTQ xəttində geniş yenidənqurma və modernizasiya işləri həyata keçirilib. Bu proses çərçivəsində texniki infrastruktur yenilənib və xəttin yükdaşıma potensialı artırılıb.

Aparılan işlərin nəticəsində Bakı-Tbilisi-Qars xəttinin illik ötürücülük qabiliyyəti 1 milyon tondan 5 milyon tona yüksəlib. Ekspertlər hesab edirlər ki, bu artım Orta Dəhliz üzrə tranzit yükdaşımalarının həcminə müsbət təsir göstərəcək.

Son illərdə Çin-Avropa ticarət marşrutlarına marağın artması BTQ layihəsinin əhəmiyyətini daha da artırıb. Xəttin yaxın illərdə regionun əsas logistika bağlantılarından birinə çevriləcəyi proqnozlaşdırılır.