Azərbaycanda istehsalatda baş verən bədbəxt hadisələr nəticəsində əlilliyin müəyyənləşdirilməsi mexanizmi yenilənir. Yeni qaydalar əlillik dərəcələrinin daha şəffaf və vahid meyarlar əsasında təyin edilməsini nəzərdə tutur.

Mövzu ilə bağlı açıqlama verən Milli Məclisin deputatı Vüqar Bayramov bildirib ki, Nazirlər Kabineti bu istiqamətdə normativ sənədlərdən birini təsdiqləyib, digərinə isə dəyişikliklər edib. Qəbul olunan yeniliklər nəticəsində əlillik dərəcəsinin müəyyənləşdirilməsi zamanı konkret göstəricilərə əsaslanan yeni yanaşma tətbiq ediləcək.

Əlillik dərəcəsi xüsusi formula ilə hesablanacaq

Yeni mexanizmə əsasən, istehsalat qəzaları nəticəsində yaranan sağlamlıq məhdudiyyətlərinin qiymətləndirilməsi üçün xüsusi hesablama formulu istifadə olunacaq. Bu yanaşmanın qərarların subyektivliyini azaltması və bütün müraciətlərə eyni standartlarla baxılmasını təmin etməsi gözlənilir.

Dəyişikliklər həmçinin proseslərin rəqəmsallaşdırılmasını da əhatə edir. Elektron sistemlərin tətbiqi sənədləşmə və qiymətləndirmə mərhələlərinin daha operativ həyata keçirilməsinə imkan verəcək.

Proses daha şəffaf və operativ olacaq

Deputatın sözlərinə görə, yeni qaydaların əsas məqsədi istehsalat xəsarətləri ilə bağlı əlillik təyinatını daha sürətli, şəffaf və vahid meyarlarla həyata keçirməkdir. Bu yeniliklərin həm vətəndaşların müraciətlərinə baxılması müddətini azaltması, həm də qərarların obyektivliyini artırması gözlənilir.

Qeyd edək ki, son illər sosial sahədə həyata keçirilən rəqəmsal islahatlar çərçivəsində əlilliyin qiymətləndirilməsi və sosial təminat mexanizmlərinin təkmilləşdirilməsi istiqamətində bir sıra addımlar atılıb. Yeni qaydalar da bu prosesin davamı kimi qiymətləndirilir.

Daha ətraflı məlumat üçün bu videonu izləyin:

https://youtu.be/sJnKJeEf41w