Qara dənizdə mülki gəmiçiliyə qarşı növbəti hücum qeydə alınıb. Ukraynanın Baş nazirinin müavini və İcmaların və Ərazilərin İnkişafı naziri Oleksiy Kulebanın bildirdiyinə görə, mayın 29-na keçən gecə Rusiya ordusunun pilotsuz uçuş aparatları Ukraynanın dəniz dəhlizi ilə hərəkət edən üç xarici ticarət gəmisinə zərbələr endirib.

Məlumata əsasən, hücum nəticəsində gəmilərin göyərtəsində yanğınlar baş verib. Ekipaj üzvləri alovu öz qüvvələri ilə söndürərək daha ciddi nəticələrin qarşısını ala biliblər.

Hücum zamanı dənizçilər yaralanıb

Oleksiy Kuleba bildirib ki, zərər görən gəmilərdən biri Vanuatu bayrağı altında üzürdü. Həmin gəmidə iki ekipaj üzvü yüngül xəsarətlər alıb və onlara lazımi tibbi yardım göstərilib. Daha sonra gəmi təmir məqsədilə yedəyə götürülüb.

Nazir vurğulayıb ki, Rusiya tərəfindən davamlı hücumlara baxmayaraq, Ukrayna dəniz dəhlizinin fəaliyyətini təmin etməyə davam edir. Onun sözlərinə görə, limanlar və beynəlxalq ekipajlar qlobal ərzaq təhlükəsizliyi üçün vacib olan yükdaşımaları fasiləsiz şəkildə həyata keçirirlər.

Həmin gecə Rusiya qüvvələrinin Odessa vilayətindən Türkiyəyə doğru hərəkət edən, Vanuatu bayrağı altında üzən ANT adlı türk quru yük gəmisinə də zərbə endirdiyi bildirilib. Hücum nəticəsində gəmidə yanğın baş verib, iki ekipaj üzvü yaralanıb. Ukrayna hərbçiləri onları katerlərlə təxliyə edərək xəstəxanaya çatdırıblar.

Son həftələrdə hücumlar intensivləşib

Qeyd edilir ki, bu, son günlərdə mülki ticarət donanmasına qarşı ilk hücum deyil. Mayın 18-də Çin ticarət gəmisinin Ukrayna sularında pilotsuz aparatla vurulduğu açıqlanmışdı. Daha sonra isə Qvineya-Bisau, Marşal adaları və Panama bayraqları altında üzən digər mülki gəmilər də hücumlara məruz qalıb.

Həmin hadisələr zamanı gəmilərdə yanğınlar baş versə də, onlar üzmə qabiliyyətini qoruyaraq marşrutlarını davam etdirə biliblər. Son insident isə Qara dənizdə mülki gəmiçiliyin təhlükəsizliyi ilə bağlı narahatlıqları daha da artırıb.