Rusiya ordusu iyunun 2-nə keçən gecə Kiyevə növbəti dəfə genişmiqyaslı raket və pilotsuz uçuş aparatı hücumu həyata keçirib. Paytaxtın bir sıra rayonlarında dağıntılar və yanğınlar qeydə alınıb. Son məlumata görə, hücum nəticəsində azı 4 nəfər həlak olub, onlarla insan müxtəlif dərəcəli xəsarətlər alıb.

Kiyev meri Vitali Kliçko bildirib ki, hazırda 58 nəfərin zərər çəkdiyi təsdiqlənib. Onlardan 40-ı xəstəxanaya yerləşdirilib. Yaralananlar arasında iki uşağın da olduğu qeyd edilir.

“Paytaxtda 58 zərərçəkən var. Onlardan 40 nəfəri, o cümlədən iki uşaq hospitalizasiya olunub. Təəssüf ki, 4 nəfər həyatını itirib”, – deyə Kliçko açıqlamasında bildirib.

Ən böyük dağıntılar Podol rayonunda qeydə alınıb

Hücumun nəticələri Podol, Şevçenko, Obolon, Svyatoşin, Solomyan, Holosiyev, Peçersk və Darnıtski rayonlarında müşahidə olunub. Yaşayış binaları və mülki infrastruktur obyektləri ciddi zərər görüb.

Ən ağır vəziyyət Podol rayonunda yaranıb. Burada zərbələrdən sonra 9 mərtəbəli yaşayış binasının bir hissəsi çöküb. Xilasedicilər dağıntılar altında insanların qala biləcəyini istisna etmirlər və axtarış-xilasetmə əməliyyatı davam edir.

Yanğınlar və yeni dağıntılar

Holosiyev rayonunda yerləşən poliklinikalardan birində yanğın baş verib. Eyni zamanda, raket və dron qalıqlarının düşməsi nəticəsində bir neçə avtomobil yanıb, şəhərin müxtəlif nöqtələrində əlavə yanğın ocaqları yaranıb.

Şevçenko rayonunda isə raketin ehtimal olunan zərbəsi nəticəsində 24 mərtəbəli yaşayış binasında yanğın qeydə alınıb. Alov əsasən binanın 4-cü və 5-ci mərtəbələrini əhatə edib.

Hadisə yerlərində Dövlət Fövqəladə Hallar xidmətinin əməkdaşları, həkim briqadaları və digər aidiyyəti qurumlar fəaliyyət göstərir. Dağıntıların miqyası və zərərçəkənlərin sayı ilə bağlı məlumatlar dəqiqləşdirilməyə davam edir.